السلام عليكم ..

رجعنا للدوامات وترتبنا الحمد لله .. باجتماع العائلة قبل كم يوم سولفنا عن خيارات صحية حشوات لسناوديش المدارس ففلت أجمع الخيارات بتدوينة  :

 

١- زبدة الفول السوداني

لكن اختاروا نوع صحي مافيه دهون مهدرجة، مثل هذي الشركة الحبيبة:

PNB-00002-8

آخذها من الدانوب أو حلويات الرشيد وتطلع أرخص من آيهيرب لو حسبنا الشحن.

بناتي يحبون أضيف معها عسل.

٢- نوتيلا صحية

تعودنها بالمنزل وهنا طريقتها:

النوتيلا الصحي المنزلي ..

أو تشترونها جاهزة فيه مشاريع طلعت مثل : nutters.sa

وممكن تستخدمون البديل بالفول السوادني من الشركة اللي فوق أو بزبدة اللوز

٣- بيض بأشكاله :

images

ممكن تسلقون كمية وتحطونها بالثلاجة (صلاحية البيض المسلوق بالثلاجة خمس أيام) وتآخذونها الصباح ولما يجي وقت الأكل تكون صارت دافية

أو يكون بيض بالشكل اللي تحبونه بتوست وتدهنون لبنة أو أفوكادو وتضيفون خس

٤- لبنة مع عسل أو لبنة مع زعتر

Labneh-LF-Arb-Pack_lg

اللبنة خيار غيد صحي لو استخدمنا كاملة الدسم لأن دهونها عالية مثل القشطة .. أما لبنة المراعي قليلة الدسم خيار صحي لأن الدهون فيها شوي والبروتين فيها عالي.

وممكن زعتر لحاله.

٥- ديك رومي

63126_640x428

أحب النوع المدخن مع جبن وخس

٦- حمص ..

890e42fe8f678d0d926b628565061fd2a7f0d72a

خيار جميل عالي بالبروتين، طريقتي:

حمص معلب مع زبادي وفص ثوم وشوي طحينة سايلة وعصرة ليمون واستمتعوا .

ممكن تضيفون شوي شمندر مسلوق أو موية الشمندر يصير لونه وردي جميل.

٧- معجون الزيتون :

MF-Black-Olive-Tapenade2.jpg

خيار وصحي لذيذ للي يحبون الموالح ممكن تشترونه جاهز مثل اللي بالصورة (من الدانوب أو لولو) أو تسوونه بالبيت بالخلاط:

  • علبة زيتون مصفى منها الماء
  • رشة ثوم بودرة
  • معلقة زعتر
  • معلقة أو ملعقتين زيتون زيتون

اخلطوه لما يصير قوام معجون واحتفظوا فيه بالثلاجة

٨- جبن مع خيارات الخضار والورقيات اللي تفضلونها

0000017

طبعا باستثناء جبن الكاسات والجبن الكريمي

أفضل أنواع الجبن (دائما حاولوا تآخذون قليل الدسم)

  • جبن قريش أو القوتاج يتعبر الأفضل لأن نسبة الدهون فيه منخفضة. بالنسبة لي أحب آخذه بالكيلو وأخلطه مع زعتر وسماق وباربكا وحبة بركة وفلفل أسود ونعناع مجفف وزيت زيتون وأحطه بعلبة زجاجية ممكن تكورونها) أحبها مع جرجير وطماطم
  • جبن الفيتا أحبها مع نعناع وطماطم وفلفل أخضر
  • جبن الريكوتا
  • جبنة بيبي بيل (وانتبهوا خذوا المكتوب عليها بالعربي لأن المستورد غالي مرة) واذا عندكم بالدوام مايكرويف سخنوها شوي تذوب واستمستعوا
  • جبن الشيدر قليل الدسم
  • حلوم قليلة الدسم .. طبعا مع باذنجان مشوي وجرير وطماطم

٩ – بيتزا

ممكن تسوون كمية وتحطونها بالفريزر واذا بغيتوا تآخذون، وعلى السريع هذي طريقة عجينة صحية ومضبوطة وهشة اعتمدتها لكل المعجبات:

  • ٣ كاسات دقيق بر حبة كاملة (أحب حق المطاحن القطرية)
  • علبة ونص زبادي
  • ملعقة خميرة
  • ملعقة بيكنج بودر
  • ملعقتين محلي طبيعي (سكر جوز هند أو ستيفيا  أو عسل)
  • زيت زيتون وماء للعجن

وعلى كلام أخت زوجي أبرار (طباخة ماهرة ماشاء الله) إن عجينة البيتزا تضبط لما تضيفون بودرة ثوم وبودرة بصل مع المكونات و وترقونها على سميد .. ناوية أجرب هذي النصحية

١٠ – سبانخ

أستخدم خبز تورتيلا أو خبز الصويا أو خبز عادي أو كحشوة فطاير للعجينة اللي فوق تتفرزن

ممكن تحمسونه مع بصل أو تحطونه بمشخال وتعصرون عليه ليمون وتتروكه شوي يطلع موية وتحطون شوي بصل أبيض وسماق

أحب أضيف جبنة بيبي بيل أو شيدر ..

١١ – فرنش توست ..

1387643517

أحبه سهل وسريع ومفيد

التوست آخذ حق هرفي النخالة يعتبر أفضل المتوفر أو توست مخابز لولو هايبر

بيض مع شوي فانيلا ورشة ملح وحليب أغمس فيه التوست وبمقلاة ساخنة أحطه على الوجهين لما يتحمر ..

١٢- حلاوة طحينة

10199

بدبس التمر .. لذيذة وخيار صحي ممكن تضيفون جبن مالح أو لبنة ويصير اندماج المالح والحالي يمممي..

أوصي عليها من الكويت وأتوقع تلاقونها بمحلات المنتجات الكويتية

١٣- عريكة

بتضحكون علي بس الشكوى لله زوجي وبناتي يحبونها واضطريت أسويها طبعا طريقتي لا تمت بالطريقة الجنوبية بصلة لأن عدلت عليها عشان تكون صحية

ماهي ساندويش لكن فيها طحين فبلحها بالقائمة

أحط ٣ كاسات شوفان مع ٣ كاسات دقيق وأعجنها بموية وأخبزها وبمحضرة الطعام أطلعها بعد الخبز وأخطلها مع كاس تمر مزال منه النوى وأضيف شوي سمن أو زبدة .. ويتزين بفستق مبشور ولوز مبشور

خيار صحي ويشبع ولذيذ ويتفرزن ..

أتنمى يعجبكم الموضوع وأحب أقرا تعليقاتكم

وهذا موضوع كتبته قبل فترة فيه خيارات مناسبة للإضافة في علب وجبات الدوامات:

كيف استبدلت حلوى أطفالي بأطعمة مفيدة؟ 

وبالعافية .