مساء الخير ..

قبل فترة تكلمت عن موقع انجلش لايف في انستقرام، حبيت أكتب تدوينة مفصلة عن تجربتي مع الموقع .. خصوصا إني استفدت منه جدًا وحبيت أكتب تجربتي كنوع من التوثيق وكمرجع للي حابين يبحثون عنه.

الموقع طحت عليه قبل أربع سنوات بديت فيه كشكل من تمضية الوقت ما كنت جادة في الدراسة،

للتوضيح: مستواي كان صفر بالانجليزي ما تعلمت أي شيء في المدرسة أو الجامعة ، وكنت أكره هالمادة في الثانيو بسبب طريقة تدرسينا، أذكر المعلمة تجي تهاوش الفصل بالانجليزي وحنا ما ندري وش تقول ..!

مشكلة تعلم لغة جديدة إنك ما تقدر تقيس مستوى تقدمك فيها إلا بعد فترة ، وتعتقد بالبداةي إنك غير

اشتغلت على الموقع بشكل جدي لما كنت بأمريكا ، ما تسهلت دراستي في المعهد فقررت أدرس أون لاين ، استفدت جدًا منه انتقل مستواي من الصفر إلى مستوى مقبول جدًا أقدر أفتح محادثات وأدبر نفسي

ميزة الموقع يغطي أغلب جوانب الحياة وكل جانب يكون وحدة كاملة فيها محادثات وجمل وعبارات ..

يعني مثلا: وحدة السفر تغطي عبارات حجز فندق عبارات أخذ الاتجاهات – الأنشطة في بلد السفر ..

وحدة المطعم كيف أطلب طعام بطريقة صحيحة – أسماء لأغلب الأطباق ،، وهكذا

ويعلمك الاختلافات بين اللهجة الأمريكية واللهجة البريطانية .

وفيه فصل تفاعلي ، تدخل للفصل وفيه معلم وطلاب ودرس بموضوع معين ويسألك المعلم وتجاوب .. ممتاز جدا

أنصح فيه جدًا للمبتدئين ، دراسة نصف ساعة باليوم تغير مستواكم للأفضل..

طبعا ما اتقصرت على هذا الموقع كمرجع للتعليم حاولت أسمع كثير وأمارس كثير وأقرأ..

الموقع أول أسبوعين اشتراك بمبلغ دولار واحد،

بعدها الشهر ب ٦٠ دولار .. بس أنا أسوي خطة جهمنية: ألغي اشتراكي بعدين بعد فترة يرسلون لي عرض اشتراك لمدة سنة ب ٩٩ دولار وأروح أشترك ..

وأشوفه سعر معقول جدًا !

إذا ماكنتم تعرفون مستواكم فيه اختبار تحديد مستوى مجاني .. لأن المستوى الأول من الصفر يبدأ يعني كيف تقول اسمك وكيف ترحب بالناس.

الموقع يغطي القواعد والنطق والكتابة والاستماع ..

يعرض مقطع فيديو وويكتل لك العبارات اللي تركز عليها

بعدين يعري بعض القواعد

وأسئلة عن المقطع

وتسجيل صوتي عشان يتأكد من طريقة نطقك ..

قطعة تقرأها ثم أسئلة بسيطة عليها

أنا استفدت منه أكثر شي بمجال الاستماع والمحادثة

طريقة التعلم ممتعة جدا ما تحس بالملل

وتقدر تغير مستواك بكل سيهولة إذا حسيت إن المستوى اللي فيه سهل أو صعب ..

الكتابة بنهاية كل وحدة تكتب مقالة صغيرة بعدين يرسله لمعلم ويصححه لك ويرسله لك على الايميل

أنصح بتجربته خصوصا إن أول أسبوعين بدولار واحد فقط .. إذا ضبط معكم الوضع كملوا والا ألغوا الاشتراك ..

أتمنى إني أفدتكم ، كل التوفيق ،،